بيىلعى كەزەكتى جولداۋىندا دا وسى ماسەلە ەرەكشە كوڭىل ءبولدى. «ادامي كاپيتال – جاڭعىرۋ نەگىزى» دەپ اتالاتىن جەتىنشى باعىتتا جاس ۇرپاققا ءبىلىم بەرۋدىڭ جاڭا ساپاسى تۋرالى, ياكي ونىڭ مازمۇنىن زامانا تالابىنا ساي قۇرۋعا قاتىستى كەلەلى اڭگىمە قوزعاپ, ونى جۇزەگە اسىرۋدىڭ ناقتى جولدارىن كورسەتتى. اسىرەسە, ەلباسىنىڭ ء«بىلىم بەرۋ سالاسىن ەكونوميكانىڭ جەكە سالاسى رەتىندە دامىتۋ كەرەك» دەگەن ويى اسا ماڭىزدى.
جاھاندانۋ ءداۋىرى جيناقىلىقتى, ۇقىپتىلىقتى, ناقتىلىقتى تالاپ ەتەدى. پرەزيدەنتتىڭ ء«وزىنىڭ تاريحىن, ءتىلىن, مادەنيەتىن بىلەتىن, سونداي-اق زامانىنا لايىق, شەت تىلدەرىن مەڭگەرگەن, وزىق ءارى جاھاندىق كوزقاراسى بار قازاقستاندىق ءبىزدىڭ قوعامنىڭ يدەالىنا اينالۋعا ءتيىس» دەگەن ءسوزى ءبىلىمدى ۇرپاقتىڭ بويىنان تابىلار باستى قاسيەتتەر بولۋى كەرەك. قاي سالادا بولسىن ءبىلىمدى جاس وزگەلەردەن وق بويى وزىق تۇرادى. ەلدىڭ ەرتەڭى, جاس ۇرپاق جان-جاقتى, باسەكەگە قابىلەتتى, ءبىلىمدى بولسا, ول – بولاشاعىمىزدىڭ كەپىلى دەگەن ءسوز.
جالپى, پرەزيدەنت باستاماسىمەن قولعا الىنعان كەز كەلگەن مەملەكەتتىك باعدارلامانىڭ باستى ماقسات ەلىمىزدى جاڭا ساتىعا كوتەرۋ, يننوۆاتسيالىق مۇمكىندىكتەردى پايدالانۋ ارقىلى حالىقتىڭ تۇرمىستىق-الەۋمەتتىك جاعدايىن جاقسارتۋ ەكەنى بەلگىلى. «قازاقستان – 2050» ستراتەگياسىندا كورسەتىلگەندەي, ساياسي-ەكونوميكالىق الەۋەتىمىزدى رەتتەۋ ارقىلى مەملەكەتىمىزدى دامىعان 30 ەلدىڭ قاتارىنا كىرگىزۋ, وعان قوسا, مادەنيەتىمىز بەن رۋحانياتىمىزدى جەتىلدىرۋدى باستى نازاردا ۇستاۋ كەرەك.
بيىلعى جولداۋدىڭ دا مىندەت-ماقساتى وسىعان سايادى. مۇندا ساياسي تۇراقتىلىق پەن قوعامدىق كەلىسىمنىڭ ارقاسىندا ەكونوميكامىزدى, ساياساتىمىزدى جانە سانامىزدى جاڭعىرتۋعا باعىتتالعان 10 باسىمدىق كورسەتىلگەن. مەملەكەت باسشىسى العا قويعان ماقساتتاردى ء«بىر جاعادان باس, ءبىر جەڭنەن قول» شىعارىپ, بىرلەسە جۇزەگە اسىرار بولساق, مەملەكەتىمىزدىڭ الار بەلەسى مول بولماق.
تالعات كۇزەمباەۆ,
مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن قايراتكەرى
